გორში მამა-შვილის მკვლელობისთვის დაკავებულს პატიმრობა შეეფარდა

2025-04-30 13:48:08, 234 ნახვა

სამართალი/

გორში მამა-შვილის მკვლელობის ბრალდებით დაკავებული, სერგო ახალკაცს, აღკვეთის ღონისძიების სახით პატიმრობა შეეფარდა.

დღევანდელ სხდომაზე ბრალდებულმა დუმილის უფლება გამოიყენა. პროკურორის განცხადებით, სასამართლომ სრულად გაიზიარა მათი არგუმენტაცია აღკვეთის ღონისძიებასთან დაკავშირებით.

"ბრალდების მხარის მიერ, მოთხოვნილი იქნა აღკვეთის ღონისძიების სახით პატიმრობა ბრალდებულის მიმართ. იქიდან გამომდინარე, რომ მისი მხრიდან სახეზე იყო მიმალვის, ახალი დანაშაულის ჩადენის და მტკიცებულების განადგურების მომატებული საფრთხეები". - თქვა პროკურორმა.

როგორც ბრალდების მხარე განმარტავს, მას შემდეგ რაც ბრალდებულს მჭიდში ტყვიები გამოელია, დაზარალებულს ფიზიკურადაც გაუსწორდა.

"არის არაერთი პირდაპირი მტკიცებულება, რომელიც უშუალოდ ამხელენ ბრალად წარდგენილ ქმედებაში ბრალდებულს, ესაა თვითმხილველი მოწმეების ჩვენებები, ამოღებულია დანაშაულის იარაღი. გასროლა არის 5-ზე მეტი, შვილი ადგილზე გარდაიცვალა, მამასთან მიმართებით, გამოელია ვაზნები მჭიდში, ამის შემდეგ, ფიზიკური ზემოქმედებაც მოახდინა მის მიმართ, დაზარალებული დაეცა ძირს და მხოლოდ შემდეგ დატოვა მან შემთხვევის ადგილი". - განაცხადა პროკურორმა.

ცნობისთვის, გორში, 28 აპრილს ორ ადამიანს ცეცხლსასროლი იარაღიდან ესროლეს. 25 წლის კაცი ადგილზე დაიღუპა, მამამისი კი დაიჭრა და კლინიკაში გადაიყვანეს, თუმცა მისი გადარჩენა ვერ მოხერხდა.

ავტორი: ექსპრესნიუსი,