რუსეთის მიერ უკრაინაში სრულმასშტაბიანი შეჭრის დაწყებიდან, რუს სამხედრო მოსამსახურეებს შორის აივ ინფექციის შემთხვევების რაოდენობა 2000%-ით გაიზარდა. კარნეგის საერთაშორისო მშვიდობის ფონდის ახალი ანგარიშის თანახმად, მკვეთრი ზრდა განპირობებულია როგორც ფრონტზე არსებული პირობებით - ჯარისკაცებს შორის დაუცველი სექსი და ნარკოტიკების მოხმარება - ასევე რუსეთის ხელისუფლების პოლიტიკით, რომელმაც „ტრადიციული ღირებულებების დაცვის“ საფარქვეშ გაზარდა ზეწოლა აივ ინფექციის პრევენციისა და განათლების ორგანიზაციებზე.

2022 წლის ბოლოსთვის, არმიაში შემთხვევების რაოდენობა ომამდელ დონესთან შედარებით 13-ჯერ გაიზარდა, ხოლო 2024 წლის ბოლოსთვის - 20-ჯერ. ექსპერტები აფრთხილებენ: „აფეთქების დემოგრაფიული და ეკონომიკური შედეგები ათწლეულების განმავლობაში იგრძნობა და შესაძლოა უკრაინაში შეჭრის შედეგებზე კიდევ უფრო დამანგრეველი იყოს“.

ანგარიშში ასევე აღნიშნულია რუსეთში აივ ინფექციის გავრცელების ზოგადად არახელსაყრელ მდგომარეობაზე. 2022 წლიდან ქვეყანა ახალი ინფექციების რაოდენობით მუდმივად მსოფლიო ლიდერთა ხუთეულშია, მხოლოდ სამხრეთ აფრიკის, მოზამბიკის, ნიგერიის და ინდოეთის შემდეგ. 2021 წელს რუსეთში მსოფლიოში აივ ინფექციის ახალი შემთხვევების 3.9% დაფიქსირდა - ტანზანიაზე, უგანდაზე, ზამბიასა და კენიაზე მეტი.

„არ არსებობს ობიექტური მიზეზები, რის გამოც აივ ინფექციის მაჩვენებელი მთელ მსოფლიოში მცირდება, მაგრამ რუსეთში კვლავ იზრდება. ეს მხოლოდ პოლიტიკური გადაწყვეტილებებით არის განპირობებული“, - ხაზს უსვამენ კარნეგის ფონდის ანალიტიკოსები. მაგალითად, ისინი კრემლის ქმედებებს აივ ინფექციის პრევენციით დაკავებული ორგანიზაციების წინააღმდეგ ასახელებენ.

მაგალითად, 3 აპრილს რუსეთის გენერალურმა პროკურატურამ ელტონ ჯონის შიდსის ფონდის საქმიანობა, რომელიც ბრიტანელი მუსიკოსის, ელტონ ჯონის მიერ დაარსებული საქველმოქმედო ორგანიზაციაა და რომელიც აივ/შიდსის სფეროში მკურნალობას, ინფორმაციასა და სამედიცინო მომსახურებაზე ხელმისაწვდომობის გაფართოებას ემსახურება, „არასასურველად“ ცნო. სავარაუდო მიზეზი „არატრადიციული სექსუალური ურთიერთობების“ ხელშეწყობა იყო. ორგანიზაცია, რომელიც 1992 წელს დაარსდა და 90-ზე მეტ ქვეყანაში მოქმედებს, მიზნად ისახავს აივ ინფექციის სტიგმის წინააღმდეგ ბრძოლას, ლგბტქ+ ადამიანების დაცვას და შიდსის ეპიდემიის დასრულებას. თუმცა, რუსეთის ხელისუფლებამ ფონდი „დასავლური ოჯახის მოდელებისა და სქესის შეცვლის ხელშეწყობაში“ დაადანაშაულა.

„როსპოტრებნადზორის“ ეპიდემიოლოგიის ცენტრალური კვლევითი ინსტიტუტის მონაცემებით, 2022 წლის შემოდგომისთვის აივ ინფექცია რუსეთის მოსახლეობის 1%-ში - დაახლოებით 1,5 მილიონ ადამიანში - იყო დიაგნოზირებული. „რუსეთმა საკმაოდ სამწუხარო „წარმატებებს“ მიაღწია - ინფიცირებულია 1,5 მილიონამდე. ეს მოსახლეობის 1%-ია“, - განაცხადა ეპიდემიოლოგიისა და შიდსის პრევენციის დეპარტამენტის ხელმძღვანელმა ვადიმ პოკროვსკიმ. მისი პროგნოზი იმედგაცრუებას იწვევს: 2030 წლისთვის ახალი ინფექციების რაოდენობამ შეიძლება 660 000-ს მიაღწიოს.

15-დან 49 წლამდე ასაკობრივ ჯგუფში რუსეთში ინფიცირების მაჩვენებელი 1,5%-ია. ეს მეტია, ვიდრე აფრიკის ქვეყნების უმეტესობაში: მაგალითად, ეთიოპიაში ეს მაჩვენებელი 0,9%-ია, კონგოში - 0,7%-ია, ნიგერიაში - 1,3%. რუსეთი ამ მაჩვენებლით ევროპის ქვეყნებს 3-15-ჯერ უსწრებს: მაგალითად, გერმანიაში აივ ინფექცია 15-49 წლის მოსახლეობის 0.1%-ში გვხვდება, იტალიაში - 0.2%-ში, ესპანეთში - 0.4%-ში, ხოლო პორტუგალიაში - 0.5%-ში.

ავტორი: ექსპრესნიუსი,