ნატოს ქვეყნებმა უკრაინის საჰაერო სივრცეში რუსული დრონები და რაკეტები უნდა ჩამოაგდონ, განაცხადა პოლონეთის საგარეო საქმეთა მინისტრმა რადოსლავ სიკორსკიმ. „როდესაც ჩვენსკენ ფრთოსანი რაკეტა დაფრინავს - და სულ რაღაც ერთი თვის წინ, ერთ-ერთი მათგანი პოლონეთის ტერიტორიაზე აფეთქდა - გაცილებით უკეთესია თავდაცვის მიზნით ჩამოაგდოთ ის, სანამ ის ჯერ კიდევ უკრაინის საჰაერო სივრცეშია, ვიდრე დაუშვათ მისი ჩამოგდება და მისი ნამსხვრევები საზღვრის ამ მხარეს მყოფ ვინმეზე დაეცა“, - თქვა სიკორსკიმ BBC Radio 4-თან ინტერვიუში.

მისი თქმით, ასეთი მიდგომა დაეხმარება როგორც პოლონეთს, ასევე უკრაინას. კერძოდ, თუ ნატოს ქვეყნები დაიცავენ დასავლეთ უკრაინის საჰაერო სივრცეს, აღნიშნა სიკორსკიმ, ლვოვის აეროპორტი შეიძლება ხელახლა გაიხსნას. მან დასძინა, რომ ეს საკითხი ამჟამად განიხილება არა მხოლოდ პოლონეთში, არამედ ჩრდილოატლანტიკურ ალიანსშიც. რუსეთის მიერ უკრაინის ქალაქების რეგულარული დაბომბვის შედეგად არაერთხელ მოხდა რაკეტებისა და დრონების პოლონეთის ტერიტორიაზე გაფრენა.

13 სექტემბრის დილით, რუსულმა ძალებმა ბენზინგასამართ სადგურსა და სამგზავრო მატარებელს შეუტიეს ვოლინის რეგიონში, პოლონეთ-უკრაინის საზღვართან ახლოს, იაგოდინის სადგურზე. დრონი დაეჯახა კიევიდან ვარშავაში მიმავალ მატარებლის ლოკომოტივს. ეს არის რკინიგზის ხაზი, რომელიც ომის განმავლობაში უკრაინის დედაქალაქში უცხოელი ლიდერების გადაყვანას ახდენდა. რუსული თავდასხმის დროს პოლონეთის სამხედრო ძალებმა გამანადგურებლები აფრინდნენ, ხოლო უსაფრთხოების ძალებმა სასაზღვრო ზონების მაცხოვრებლებს გაფრთხილება მისცეს.

ამ ფონზე, პოლონეთის პრემიერ-მინისტრმა დონალდ ტუსკმა სასწრაფოდ მოიწვია მინისტრები, სამხედრო წარმომადგენლები და დაზვერვის წარმომადგენლები. მან განაცხადა, რომ რუსეთის მხრიდან ესკალაცია „რეალობად იქცევა“ და საფრთხეს უქმნის პოლონეთს. „მომდევნო კვირები და თვეები რუსული მხრიდან ძალიან ინტენსიური აქტივობის პერიოდი იქნება და, სამწუხაროდ, არ შეგვიძლია გამოვრიცხოთ, რომ ეს ესკალაცია ჩვენს ტერიტორიასაც შეეხება“, - განაცხადა პოლონეთის პრემიერ-მინისტრმა. ტუსკმა ხაზგასმით აღნიშნა, რომ პოლონეთი და მისი ნატოს მოკავშირეები „საჭიროების შემთხვევაში ერთობლივი რეაგირებისთვის მზად უნდა იყვნენ“.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან