სასამართლოში მათე დევიძის პროცესი მიმდინარეობს - სასამართლო პროცესს სალომე ზურაბიშვილი ესწრება

2025-06-12 16:16:07, 457 ნახვა

სამართალი/

თბილისის საქალაქო სასამართლოში პოლიციელზე თავდასხმაში ბრალდებულ 21 წლის მათე დევიძის სასამართლო პროცესი მიმდინარეობს. სასამართლო პროცესს ესწრება საქართველოს მეხუთე პრეზიდენტი სალომე ზურაბიშვილი.

დღეს შესაძლოა, განაჩენი გამოცხადდეს.

დღევანდელ სხდომაზე დაცვის მხარე დასკვნით სიტყვას წარმოთქვამს, ამასთან, ბრალდებული მათე დევიძე საბოლოო სიტყვით ისარგებლებს. აღნიშნული საკითხების გავლის შემდეგ, მოსამართლე სათათბიროდ განაჩენის გამოსატანად გავა.

სასამართლოს როგორც გარე, ასევე შიდა პერიმეტრზე, დიდი ოდენობით არიან სამართალდამცავები მობილიზებული.

მათე დევიძის საქმეში დაზარალებულის სტატუსი სამ პოლიციელს - ბიძინა ჟამერაშვილს, ლევან კოდალაშვილს და გიორგი ესტატიშვილს აქვს. კერძოდ კი, პროკურატურის მტკიცებით, მათ ბრალდებულმა დროშის ტარი ჩაარტყა.

ცნობისთვის, მათე დევიძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. აღნიშნული ქმედება 4-დან 7-წლამდე თავისუფლების აღკვეთას ითვალისწინებს.

ავტორი: ექსპრესნიუსი,